Skip to main content

விவசாய மின் இணைப்பில் மீட்டர் பொருத்தப்பட்டதால் விவசாயிகள் அதிர்ச்சி! இலவச மின்சாரத்தை ரத்து செய்ய திட்டமா?

Published on 24/05/2020 | Edited on 25/05/2020

 

Agricultural electrical connection


கடலூர் மாவட்டம் விருத்தாசலம் அருகேயுள்ள கோ.ஆதனூர் கிராமத்தைச் சேர்ந்தவர் வெங்கடேசன். இவர் தனக்குச் சொந்தமான விவசாய நிலத்தில் இலவச மின்சார இணைப்பு பெறுவதற்காக விண்ணப்பித்து கடந்த 3 ஆண்டுகளாகக் காத்து கொண்டிருந்தார். ஆனால் இலவச இணைப்பு கிடைக்காததால், தட்கல் முறையில் 3 லட்சம் ரூபாய் பணம் செலுத்தி மின் இணைப்பு பெற்றுள்ளார். 
 


இந்நிலையில் தட்கல் முறையில் பெற்ற மின் இணைப்புடன், மின்சாரத்தை அளவிட பயன்படுத்தப்படும் மின் மீட்டரை ஊழியர்கள் வைத்துள்ளனர். இதுகுறித்து மின்சாரத் துறை அதிகாரியிடம் கேட்டபோது, மின்சாரத்தை அளவிடும் கருவி பொருத்தப்பட்டதால் விவசாயிகளுக்கு எவ்வித பாதிப்பும் இல்லை என்று கூறியுள்ளனர். ஆனாலும் மீட்டர் பொருத்தப்பட்டதால் இலவச மினசாரம் ரத்து செய்யப்படுமோ எனும் அச்சம் விவசாயிகளிடம் பரவியுள்ளது.  
 

இதுகுறித்து கடலூர் மாவட்ட விவசாய சங்கங்களின் கூட்டமைப்புத் தலைவர் கார்மாங்குடி வெங்கடேசன் கூறுகையில், “கடந்த 1985-ஆம் ஆண்டு முதல் விவசாயிகளுக்கு இலவச மின் இணைப்பு வழங்கப்பட்டு வருகிறது. இந்நிலையில் கடலூர் மாவட்டத்தில் போதிய மழை இல்லாத காரணத்தினாலும், நெய்வேலி என்.எல்.சி. நிறுவனம் நிலத்தடி நீர் உறிஞ்சுவதாலும் நிலத்தடி நீர்மட்டம் அதாள பாதாளத்திற்குச் சென்று விட்டது.  
 


தமிழக அரசு விவசாயத்திற்குப் பயன்படுத்தப்படும் மோட்டார்களில், ஒரு குதிரைத்திறன் மின்சார பயன்பாட்டுக்கு 20 ஆயிரம் ரூபாய் வசூலிக்க வேண்டும் என்றும், வருகின்ற ஜூன் 30-ஆம் தேதிக்குள் அதற்காக டெபாசிட் செய்ய வேண்டும் என்றும் உத்தரவு பிறப்பித்துள்ளதாக விவசாயிகள் தெரிவிக்கின்றனர். மேலும் 100 முதல் 150 அடி வரை உள்ள நீர் மட்டத்திற்கு 5 முதல் 10 குதிரைத்திறன் கொண்ட மோட்டார்களைப் பயன்படுத்தி வந்த நிலையில், தற்போது நீர்மட்டம் 600 அடிக்கு மேல் சென்று விட்டதால், விவசாயிகள் ஒவ்வொருவரும் 400 அடி முதல் 600 அடிக்கு ஆழ்துளை கிணறு அமைத்து, 15 முதல் 20 குதிரைத்திறன் கொண்ட மின் மோட்டார்களைப் பயன்படுத்தி வருகின்றனர். 
 

Agricultural electrical connection


தமிழகஅரசு கூறுவதுபோல் மின்சார கட்டணம் டெபாசிட் ஆக கட்ட வேண்டுமென்றால் 2 லட்ச ரூபாய்க்கு மேல் ஒவ்வொரு விவசாயியும் டெபாசிட் கட்ட வேண்டும். அப்படி ஒரு நிலை ஏற்படுமாயின் விவசாயிகள் பெருமளவில் பாதிக்கப்படுவது மட்டுமல்லாமல் தங்களின் வாழ்வாதாரத்தை முற்றிலுமாக இழந்துவிட நேரிடும். எனவே இத்திட்டத்தை மத்திய, மாநில அரசுகள் கைவிட வேண்டும் என்று கோரிக்கை வைக்கின்றனர். 
 

http://onelink.to/nknapp

 

மத்திய அரசு அறிவித்துள்ள புதிய மின் திட்டம் விவசாயிகளுக்குப் பெரும் பாதிப்பை ஏற்படுத்தும். அதனால் விவசாயத்திற்கு இலவச மின் இணைப்பு தொடர்ந்து தர வேண்டும், மின் மீட்டர் பொருத்துவதை நிறுத்த வேண்டும். அவ்வாறு விவசாயிகளின் கோரிக்கையை ஏற்காவிட்டால், விவசாய சங்கத்தின் சார்பில் மாபெரும் போராட்டத்தில் ஈடுபட நேரிடும் என எச்சரிக்கை விடுத்தார்.
 

 

 


 

சார்ந்த செய்திகள்

Next Story

சம்பா மகசூல் இழப்பீடு 560 கோடி ரூபாய் - தமிழக அரசு அறிவிப்பு

Published on 21/09/2023 | Edited on 21/09/2023

 

nn


சம்பா மகசூல் இழப்புக்கு 560 கோடி ரூபாய் இழப்பீடு வழங்குவதற்கான அறிவிப்பைத் தமிழக வேளாண் மற்றும் உழவர் நலத்துறை வெளியிட்டுள்ளது.

 

இது தொடர்பாகத் தமிழக அரசின் வேளாண் உழவர் நலத்துறை வெளியிட்டுள்ள செய்திக் குறிப்பில், 'அரசின் பயிர்க் காப்பீட்டுத் திட்டத்தின் கீழ் 2022-2023 ஆம் ஆண்டு சம்பா பருவ நெற்பயிரில் இயற்கை இடர்பாடுகளால் ஏற்பட்ட மகசூல் இழப்புக்கு 560 கோடி ரூபாய் இழப்பீட்டுத் தொகை வழங்கப்பட உள்ளது. இயற்கை இடர்பாடுகளால் ஏற்படும் பயிர் இழப்பிலிருந்து விவசாயிகளின் வாழ்வாதாரத்தைப் பாதுகாக்கப் பயிர்க் காப்பீட்டுத் திட்டம் தமிழ்நாட்டில் தொடர்ந்து செயல்படுத்தப்பட்டு வருகிறது. அதன்படி ஏழு லட்சம் ஏக்கர் சம்பா மகசூல் இழப்புக்கு 560 கோடி ரூபாய் இழப்பீடு வழங்கப்படுகிறது' எனத்  தெரிவிக்கப்பட்டுள்ளது.

 

2022-23 ஆம் ஆண்டில் சம்பா பருவ நெல் சாகுபடியில் 46 மெட்ரிக் டன் உற்பத்தி அடையப்பட்ட போதிலும், வடகிழக்கு பருவமழை குறைவாகப் பெய்த காரணத்தால் ராமநாதபுரம், சிவகங்கை, புதுக்கோட்டை, தென்காசி, விருதுநகர், தூத்துக்குடி ஆகிய மாவட்டங்களில் கிட்டத்தட்ட பல்லாயிரக்கணக்கான ஏக்கர் 33 சதவீதத்திற்கும் மேற்பட்ட வேளாண் பயிர்களுக்கு மாநில பேரிடர் நிதியிலிருந்து 181 கோடி ரூபாய் ஏற்கனவே வழங்கி உள்ளது.  இந்த நிலையில் தற்போது 560 கோடி ரூபாய் வழங்கப்பட இருக்கிறது. 6 லட்சம் தகுதியுடைய விவசாயிகளின் வங்கிக் கணக்கில் நேரடியாக ஒரு ஏக்கருக்கு இவ்வளவு என்று வரவு வைக்கப்படும் என்று தகவல்கள் வெளியாகியுள்ளன.

 

 

Next Story

"விதிகளை மீறினால் உரிமம் ரத்து செய்யப்படும்" - வேளாண்மை துறை 

Published on 31/12/2022 | Edited on 31/12/2022

 

agriculture department new guidance to fertilizer centre 

 

உரக்கடைகளில் மானிய விலை உரம் வாங்கும் விவசாயிகளிடம் இணை இடுபொருட்களை வாங்கும்படி கட்டாயப்படுத்தக்கூடாது என உரக்கடைகளுக்கு வேளாண்மைத்துறை உத்தரவிட்டுள்ளது.

 

நாமக்கல் மாவட்ட வேளாண் இணை இயக்குநர் துரைசாமி கூறியதாவது, "நாமக்கல் மாவட்டத்தில் தற்போது பெய்துள்ள மழையைப் பயன்படுத்தி பருத்தி, மக்காச்சோளம், நெல், கம்பு உள்ளிட்ட பயிர்களை விவசாயிகள் பயிரிட்டுள்ளனர். இந்நிலையில் தொடக்க வேளாண் கூட்டுறவு கடன் சங்கம் மற்றும் தனியார் உரக்கடைகளில் யூரியா 1388 மெட்ரிக் டன், பொட்டாஷ் 959 மெட்ரிக் டன், சூப்பர் பாஸ்பேட் 390 மெட்ரிக் டன், காம்ப்ளக்ஸ் 4103 டன் என மொத்தம் 8 ஆயிரம் டன் உரங்கள் இருப்பு வைக்கப்பட்டு உள்ளது.

 

இவை அனைத்தும் விவசாயப் பயன்பாட்டுக்காக விற்பனை செய்யப்பட்டு வருகிறது. மானிய விலை உரங்களுடன் இதர இணை இடு பொருட்களை வாங்குமாறு விவசாயிகளை யாரும் கட்டாயப்படுத்தக்கூடாது என உர விற்பனையாளர்களுக்கு அதிகாரிகள் உத்தரவிட்டுள்ளனர். தனியார் உரக் கடை உரிமையாளர்கள், அரசு நிர்ணயித்துள்ள விலைக்கு மட்டுமே உரங்களை விற்பனை செய்ய வேண்டும் என அறிவுறுத்தப்பட்டுள்ளது. ரசாயன உரங்களின் இருப்பு மற்றும் விலைப் பட்டியல் விவரங்களை விவசாயிகள் தெரிந்துகொள்ளும் வகையில் விற்பனை நிலையங்களின் தகவல் பலகையில் எழுதி வைக்க வேண்டும்.

 

விவசாயிகளின் விருப்பத்திற்கு மாறாக மானிய விலை உரங்களுடன் இணை இடுபொருட்களை வாங்கும்படி கட்டாயப்படுத்தக் கூடாது. உர விற்பனையாளர்கள் உரங்களை விற்பனை செய்யும்போது விற்பனை விலைப் பட்டியலை வழங்க வேண்டும். உரக்கட்டுப்பாட்டு சட்ட விதிகளை மீறும் உர விற்பனையாளர்கள் மீது கடும் நடவடிக்கை எடுக்கப்படும். இதை மீறி உரம் விற்பனை செய்தால், விற்பனை நிலையத்தின் உர விற்பனை மையத்தின் உரிமம் ரத்து செய்யப்படும். இவ்வாறு வேளாண்மைத் துறை இணை இயக்குநர் துரைசாமி தெரிவித்துள்ளார்.