Skip to main content

“அவர் திமுகவிற்கு சென்ற பிறகு இங்கே திட்டத்தை நகர்த்த முடியவில்லை” - செங்கோட்டையன் பேச்சு

Published on 06/02/2023 | Edited on 06/02/2023

 

"After going to DMK, even he could not move the project here"-Sengottaiyan's speech

 

ஈரோடு இடைத்தேர்தல் அறிவிப்பைத் தொடர்ந்து திமுக தனது தேர்தல் பிரச்சாரத்தைத் தீவிரப்படுத்தியுள்ளது. அதேநேரம் அதிமுக தற்பொழுதுதான் வேட்பாளரை உறுதிப்படுத்தியுள்ளது. இந்நிலையில், முன்னாள் அமைச்சர் செங்கோட்டையன்  'ஒளிரும் ஈரோடு பவுண்டேஷன்' நிகழ்ச்சியில் கலந்துகொண்டு பேசுகையில், “கேட்டதைக் கொடுப்பவனே, கிருஷ்ணா கிருஷ்ணா என்று சொல்வார்கள். அதேபோல் நபிகளை பொறுத்தவரை 'இறைவனிடம் கையேந்துங்கள் அவன் இல்லை என்று சொல்லுவதில்லை' என்று சொல்வார்கள். இயேசுநாதரை சொல்லும் பொழுது 'தட்டுங்கள் திறக்கப்படும், கேளுங்கள் கொடுக்கப்படும்' என்று சொல்வார்கள். ஆனால், கேட்காமலே கொடுக்கும் உள்ளங்கள் இங்கே நிறைந்துள்ளது.  எங்களை பொறுத்தவரை இங்கே சொல்வதற்கு ஒன்றே ஒன்றுதான் உள்ளது.

 

எம்ஜிஆர் காலத்தில் இந்த மாவட்டம் பிரிக்கப்பட்டது. ஜெயலலிதா காலத்தில் பல்வேறு திட்டங்கள் நிறைவேற்றப்பட்டது. அதற்கு பிறகு எடப்பாடியின் ஆட்சியில் சிறந்த முறையில் அமைதியான முறையில் நான்காண்டு காலம் பல்வேறு சோதனைகளுக்கு இடையில் ஆட்சி சீரோடும் சிறப்போடும் அரவணைத்து செல்கின்ற ஆட்சியாக இருந்தது. நீங்கள் எல்லாம் அறிந்தவர்கள்; எல்லாம் தெரிந்தவர்கள். உங்களுக்கு சொல்ல வேண்டும் என்று தேவையில்லை. ஆனால் திராவிட முன்னேற்றக் கழகம் என்று ஆட்சிக்கு வந்தாலும் இங்கு திட்டங்கள் நடைபெறுவதில்லை. ஈரோடு தொகுதியை பொறுத்தவரை அவர்கள் எடுத்துச் சொல்லட்டும் நாங்கள் இது போன்ற திட்டங்களை நிறைவேற்றி இருக்கிறோம் என்று. ஒரு திட்டத்தை அவர்களால் சொல்ல முடியாது. முத்துசாமி அதிமுகவில் இருந்தபோது பல திட்டங்களைக் கொடுத்தார். ஆனால், அவர் திமுகவிற்கு சென்றதற்கு பிறகு அவராலும் கூட இங்கே ஒரு திட்டத்தையும் நகர்த்த முடியவில்லை.

 

இந்த தேர்தலில் நீங்கள் என்ன நினைக்கிறீர்கள் என்று எங்களால் புரிந்துகொள்ள முடியாது. கண்ணதாசன் ஒன்றைச் சொல்வார் 'பாலுக்குள் தயிர் இருக்கிறது; தயிருக்குள் வெண்ணெய் இருக்கிறது; வெண்ணெய்க்குள் நெய் இருக்கிறது; ஒன்றுக்கு ஒன்று உப்பிடுகிறது. ஆனால், மனிதன் உள்ளத்தில் என்ன இருக்கிறது என்று நம்மால் புரிந்துகொள்ள முடியவில்லை' என்று கண்ணதாசன் சொன்னார். இதனால் ஒவ்வொருவரின் உள்ளங்களிலும் என்ன இருக்கிறது என்று நம்மால் புரிந்து கொள்ள முடியாது. ஆனால், உங்கள் உள்ளங்களில் எங்களை வாழ வைக்கும் எண்ணம் இருக்கிறது. ஆகவே வாழ வையுங்கள். நன்றி'' என்றார்.

 


 

சார்ந்த செய்திகள்

 

Next Story

சட்டப்பேரவையில் இருந்து அதிமுக வெளிநடப்பு!

Published on 22/06/2024 | Edited on 22/06/2024
ADMK walkout from the Legislative Assembly

சென்னை தலைமைச் செயலகத்திலுள்ள சட்டமன்றப் பேரவை மண்டபத்தில் தமிழக சட்டசபை பேரவைக் கூட்டம் நேற்று முன்தினம் (20.06.2024) தொடங்கியது. கூட்டத் தொடரின் முதல் நாளான நேற்று முன்தினம் மறைந்த முன்னாள் சட்டமன்ற உறுப்பினர்களுக்கு இரங்கல் தெரிவித்து மௌன அஞ்சலி செலுத்தப்பட்டது. கள்ளக்குறிச்சியில் கள்ளச்சாராயம் குடித்து உயிரிழந்தவர்களுக்கு இரங்கல் தெரிவிக்கப்பட்டது. இத்தகைய சூலில் தான் சட்டப்பேரவை கூட்டத் தொடரின் மூன்றாம் நாளான இன்று (22.06.2024) பல்வேறு துறைகளின் மீதான மானியக் கோரிக்கைகளின் மீது விவாதமும், வாக்கெடுப்பும் நடைபெற உள்ளது.

இந்நிலையில் அதிமுக பொதுச் செயலாளரும், எதிர்க்கட்சித் தலைவருமான எடப்பாடி பழனிசாமி உள்ளிட்ட அதிமுக எம்.எல்.ஏ.க்கள் இரண்டாவது நாளாக இன்றும் கருப்பு சட்டை அணிந்து சட்டமன்றத்திற்கு வருகை தந்தனர். அதனைத் தொடர்ந்து கள்ளக்குறிச்சி விவகாரம் தொடர்பாக சட்டமன்றத்தில் 2 வது நாளாக இன்றும் அதிமுகவினர் அமளியில் ஈடுபட்டனர். அப்போது கேள்வி நேரத்தில் கள்ளக்குறிச்சி விவகாரம் தொடர்பாக விவாதிக்க வேண்டும் என அதிமுக உறுப்பினர்கள் அமளியில் ஈடுபட்டனர். 

ADMK walkout from the Legislative Assembly

அதற்குச் சபாநாயகர் அப்பாவு, “கேள்வி நேரம் முடிந்த பிறகு, எந்த பிரச்சனையை எழுப்பினாலும் அனுமதி தருகிறோம்” எனத் தெரிவித்தார். இதனையடுத்து கள்ளக்குறிச்சி விவகாரத்தை விவாதிக்கக் கோரி கேள்வி நேரத்தில் தொடர்ந்து அமளியில் ஈடுபட்ட நிலையில் சபாநாயகர் அனுமதி அளிக்காததால் அதிமுக சட்டமன்ற உறுப்பினர்கள் பேரவையில் இருந்து வெளிநடப்பு செய்தனர். அதன் பின்னர் சபாநாயகர் அப்பாவு பேரவையில், “புறக்கணிப்பில் அதிமுக ஏன் உறுதியாக உள்ளது எனத் தெரியவில்லை. எல்லா இடங்களிலும் புறக்கணிக்கிறார்கள் என்றால் சட்டப்பேரவையையும் புறக்கணிக்கிறார்கள்” எனத் தெரிவித்தார். 

Next Story

‘முதல்வர் ராஜினாமா செய்ய வேண்டும்’ - இ.பி.எஸ். வலியுறுத்தல்! 

Published on 22/06/2024 | Edited on 22/06/2024
 Cm should resign EPS Emphasis

சட்டப்பேரவை கூட்டத் தொடரின் இரண்டாம் நாள் கூட்டம் நேற்று (21.06.2024) காலை 10 மணிக்குத் தொடங்கியது. அப்போது கள்ளக்குறிச்சி கள்ளச்சாராய சம்பவம் குறித்து விவாதிக்க அதிமுக உட்பட எதிர்க்கட்சிகள் சார்பில் வலியுறுத்தப்பட்டது. மேலும் சட்டப்பேரவையில் அதிமுக எம்.எல்.ஏக்கள் அமளியில் ஈடுபட்டனர். இதனையடுத்து சட்டப்பேரவையில் இருந்து அதிமுக எம்.எல்.ஏக்கள் குண்டுக்கட்டாக வெளியேற்றப்பட்டனர். அதோடு அவை நடவடிக்கைகள் பாதிக்கும் வகையில் அதிமுக உறுப்பினர்கள் செயல்பட்டதால் நேற்று ஒருநாள் சட்டப்பேரவை நிகழ்வில் பங்கேற்க பேரவைத் தலைவர் தடைவிதித்திருந்தார்.

அதனைத் தொடர்ந்து தமிழக முதல்வர் மு.க.ஸ்டாலின் சட்டப்பேரவையில் பேசுகையில், “மானியக் கோரிக்கைகள் மீதான விவாதம் நடைபெற உள்ள நிலையில், வெளியேற்றப்பட்டவர்கள் இந்த அவைக்கு வினாக்கள் விடைகள் நேரம் முடிந்த பின்னரே அனுமதிக்கப் பெறலாம் என்னும் வேண்டுகோளையும், பிரதான எதிர்க்கட்சி தன்னுடைய கருத்தினைப் பதிவு செய்ய வாய்ப்பு தர வேண்டும் என்றும், இதனைத் தாங்கள் பரிசீலித்து ஆவன செய்ய வேண்டுமெனக் கேட்டு அமர்கிறேன்” எனத் தெரிவித்தார். அதனைத் தொடர்ந்து முதல்வரின் உரையைச் சுட்டிக்காட்டி அதிமுக உறுப்பினர்கள் அவைக்குள் வர சபாநாயகர் அப்பாவு அனுமதி அளித்தார். இருப்பினும் அவை நிகழ்வில் பங்கேற்கவில்லை என அதிமுக அறிவித்தது. அதோடு சட்டமன்றத்தில் எடப்பாடி பழனிசாமி இருந்து புறப்பட்டுச் சென்றார். 

 Cm should resign EPS Emphasis

இந்நிலையில் தமிழக எதிர்க்கட்சித் தலைவரும், அதிமுக பொதுச் செயலாளருமான எடப்பாடி பழனிசாமி தனது எக்ஸ் தளத்தில் வெளியிட்டுள்ள பதிவில், “கள்ளக்குறிச்சி கள்ளச்சாராய மரணங்கள் குறித்த விவாதம் நடத்தக்கோரி அதிமுக சட்டமன்ற உறுப்பினர்கள் முழக்கமிட்டபோது சபாநாயகர் எங்களை வலுக்கட்டாயமாக வெளியேற்றினார். அதன் பிறகு வந்த முதல்வர் மு.க. ஸ்டாலின் தான் ‘ஜனநாயக மாண்பு காப்பாளர்’ என்று கூறி கள்ளச்சாராய மரணங்கள் குறித்த முற்றிலும் ஏற்கத்தகாத ஒரு விளக்கத்தை அளித்துள்ளார். அதிமுகவினர் சபையில் இல்லாதபோது வந்து, தான் ஓடி ஒளியவில்லை என்று திமுக முதல்வர் சொல்வது நகைப்புக்குரியது.

சென்ற ஆண்டு செங்கல்பட்டு மற்றும் விழுப்புரம் மாவட்டங்களில் 23 பேர் கள்ளச்சாராயத்தால் உயிரிழந்த பிறகாவது, திமுக அரசு கள்ளச்சாராயத்தை ஒழிக்க ஏதேனும் நடவடிக்கை எடுத்திருந்தால் இன்று கள்ளக்குறிச்சியில் இச்சோகம் நிகழ்ந்திருக்காது. எனவே, கள்ளக்குறிச்சி கள்ளச்சாராய மரணங்களுக்கு முழு பொறுப்பு முதல்வர் மு.க. ஸ்டாலின் தான். இப்போது வந்து ‘நான் அதிகாரிகளை மாற்றிவிட்டேன்’ என்று சொல்வது பொறுப்பற்றத் தன்மையின் உச்சம்.

மக்கள் நலன் ஒன்றே அதிமுகவின் அரசியல் ஆதாயம். அந்த ஆதாயம் நிறைவேற நாங்கள் அனைத்து ஜனநாயக வழிகளிலும் போராடுவோம். 18.02.2017 அன்று நீங்கள் சட்டப்பேரவையில் அரங்கேற்றிய அராஜகம், தமிழ்நாடு சட்டப்பேரவை கண்டிராத ஜனநாயகப் படுகொலை. ஜனநாயக மாண்பைப் பற்றிப் பேச திமுகவிற்கு எந்த அருகதையும் இல்லை. நீங்கள் அதிகாரிகளை மாற்றவே 50 உயிர்கள் பலியாக வேண்டுமா?. இப்போது நீங்கள் வாசிக்கும் பட்டியலால் போன 50 உயிர்கள் மீண்டும் வந்துவிடுமா?. மனசாட்சி என்பது கொஞ்சமும் இருந்தால் முதல்வர் ராஜினாமா செய்ய வேண்டும்”எனக் குறிப்பிட்டுள்ளார்.