Skip to main content

புதிய கல்விக் கொள்கை ; முதல்வர் பேச்சுக்கு மத்திய அமைச்சர் ரியாக்‌ஷன்

Published on 18/08/2023 | Edited on 18/08/2023

 

Union Minister's reaction to Chief Minister's speech about National Education policy

 

கர்நாடகாவில் கடந்த மே மாதம் நடந்த சட்டமன்றத் தேர்தலில் காங்கிரஸ் கட்சி வெற்றி பெற்று முதல்வராக சித்தராமையா பதவியேற்றார். இந்த நிலையில், காங்கிரஸ் தலைமை அலுவலகத்தில் முதல்வர் சித்தராமையா தலைமையில் நேற்று முன்தினம் காங்கிரஸ் கமிட்டி கூட்டம் நடைபெற்றது. இந்த கூட்டத்தில் பேசிய சித்தராமையா, “ தேசிய கல்விக் கொள்கை கர்நாடகாவில் பா.ஜ.க ஆட்சி காலத்தில் அமல்படுத்தப்பட்டது. இது, பா.ஜ.க ஆட்சி செய்யும் எந்த மாநிலத்திலும் அமல்படுத்தப்படவில்லை.

 

தேசிய கல்விக் கொள்கை முறையை அழிப்பதற்கான அனைத்தையும் நாம் கவனமாக தயார்படுத்த வேண்டும். அதனால், தேவையான சில தயாரிப்புகளைச் செய்த பிறகு தான் தேசிய கல்வி கொள்கை முறையை ஒழிக்க முடியும். இந்த ஆண்டு அந்த தயாரிப்புகளுக்கு போதுமான நேரம் இல்லை. கர்நாடகா மாநில சட்டமன்ற தேர்தல் முடிவுகள் வந்து காங்கிரஸ் ஆட்சி அமைக்கும் போது பள்ளிகளில் கல்வியாண்டு தொடங்கிவிட்டது.

 

இந்த கல்வியாண்டில் நடுப்பகுதியில் புதிய பாடத்தை புகுத்தினால் மாணவர்களுக்கு சிக்கல்களை ஏற்படுத்தும். அதனால், மாணவர்களின் தற்போதைய கல்விக்கு இடையூறு ஏற்படாத வகையில் இந்த கல்வி ஆண்டில் தேசிய கல்விக் கொள்கை முறை தொடரும். அடுத்த கல்வி ஆண்டு முதல் தேசிய கல்விக் கொள்கை முறை ரத்து செய்யப்படும். இந்திய அரசியலமைப்பின்படி தேசிய கல்விக் கொள்கையை மாற்றி மாநில கல்வி கொள்கை முறை அறிமுகப்படுத்தப்படும்” என்று கூறினார்.

 

இந்த நிலையில், மத்திய கல்வி அமைச்சர் தர்மேந்திர பிரதான் இது குறித்து ட்விட்டர் பக்கத்தில் கருத்து தெரிவித்துள்ளார். அதில் அவர், “கல்வி என்பது முன்னேற்றத்தின் கலங்கரை விளக்கமாக இருக்க வேண்டுமே தவிர அரசியலின் பகடைக்காயாக இருக்கக்கூடாது. நமது கல்வி முறையில் மாற்றங்கள் தேவை. அதனால், பல்வேறு கட்ட ஆலோசனைகள், அனைத்து மக்களின் விருப்பங்கள் ஆகியவற்றை மனதில் வைத்து தான் தேசிய கல்விக் கொள்கை உருவாக்கப்பட்டுள்ளது. கர்நாடகா அரசின் இந்த முடிவு சீர்திருத்தத்துக்கு எதிரான செயல் ஆகும். கர்நாடகத்திற்கு முற்போக்கான மற்றும் அனைவரையும் உள்ளடக்கிய தலைமை தேவையே தவிர அற்ப அரசியல் அல்ல. மாணவர்களின் ஒளிமயமான எதிர்காலத்திற்கு முதல் இடம் கொடுப்போம். அற்ப அரசியல் விளையாடுவதை நிறுத்திக் கொள்ள வேண்டும்” என்று தெரிவித்தார். 

 

 

சார்ந்த செய்திகள்

 

Next Story

கொலையாளியைத் தேடிச் சென்ற மோப்ப நாய். நொடிப் பொழுதில் நடந்த திடீர் திருப்பம்!

Published on 19/07/2024 | Edited on 19/07/2024
The sniffer dog that went looking for the culprit in karnataka

கர்நாடகா மாநிலம், சன்னகிரி தாலுகா, சந்தேபென்னூர் பகுதியில் உள்ள சாலையோர பெட்ரோல் பங்க் அருகே ஆண் சடலம் ஒன்று கொலை செய்யப்பட்டு கிடந்துள்ளது. இதனைக் கண்ட ரோந்து பணியில் ஈடுபட்டிருந்த போலீசார், இது குறித்து உயர் அதிகாரிக்கு தகவல் கொடுத்தனர். தகவல் அறிந்த எஸ்.பி உமா பிரசாந்த், பிற காவல்துறையினருடன், ‘துங்கா 2’ என்ற மோப்ப நாய் மற்றும் அதை கையாளுபவர் ஆகியரோடு சம்பவ இடத்திற்கு வந்தனர்.

அங்கு சென்ற போது, ஆண் சடலத்தின் சட்டையை மோப்பமிட்ட துங்கா 2 என்ற மோப்ப நாய், கொலையாளி இருக்கும் இடத்தை நோக்கி ஓடியது. துங்கா 2 மற்றும் அதைக் கையாளுபவர், சுமார் 8 கி.மீ தூரம் ஓடிய பின்பு, பெரிய சத்தம் கேட்ட ஒரு வீட்டில் நாய் நின்றது. இதன் மூலம், அந்த வீட்டிற்கு சென்ற போலீசார், ஒரு நபர் ஒரு பெண்ணை இரக்கமின்றி அடித்து கொலை செய்ய முயற்சிப்பதைக் கண்டு அதிர்ச்சியடைந்தனர். இதனையடுத்து, பாதிக்கப்பட்ட பெண்ணை மீட்டு சிகிச்சைக்காக மருத்துவமனைக்கு அனுப்பி வைத்தனர்.

மேலும், பெண்ணைக் கொலை செய்ய முயன்ற நபரை கைது செய்து விசாரணை நடத்தினர். அந்த விசாரணையில், போலீசார் தேடி வந்த கொலையாளி அந்த நபர் தான் என்றும் அவரது பெயர் ரங்கசாமி என்றும் தெரியவந்தது. மேலும், கொலை செய்யப்பட்ட சந்தேபென்னூரைச் சேர்ந்த சந்தோஷும், ரங்கசாமியின் மனைவியும் திருமணத்தை மீறிய உறவில் இருந்தததாகக் கூறப்படுகிறது. இந்த விவகாரம் ரங்கசாமிக்கு தெரியவர, ஆத்திரமடைந்து சந்தோஷை அரிவாளால் வெட்டிக் கொலை செய்து விட்டு, தனது மனைவியைக் கொலை செய்ய திட்டமிட்டுள்ளார். 

அதன்படி, வீட்டிற்கு வந்த ரங்கசாமி, தனது மனைவியை அடித்து கொலை செய்யும் நேரத்தில் போலீசாரால் தடுத்து நிறுத்தப்பட்டார் என்பது தெரியவந்தது. கொலையாளியைக் கண்டுபிடிக்க மழையில் 8 கி.மீ ஓடி நொடி பொழுதில் பெண் ஒருவரின் உயிரைக் காப்பாற்றிய துங்கா 2 என்ற மோப்ப நாயை அனைவரும் பாராட்டி வருகின்றனர். 

Next Story

சட்டமன்றம் வரை சென்ற வேட்டி விவகாரம்; வணிக வளாகத்திற்கு எதிராக அதிரடி நடவடிக்கை!

Published on 19/07/2024 | Edited on 19/07/2024
Action against the shopping mall in bangalore

கர்நாடகா மாநிலம், பெங்களூர் மாகடி சாலையில் ஜி.டி. வேர்ல்ட் என்ற தனியார் வணிக வளாகத்தில் கடந்த 16ஆம் தேதி பகீரப்பா என்ற விவசாயி தனது மகன் நாகராஜுடன், அங்குள்ள மல்டிபிளக்ஸ் தியேட்டரில் படம் பார்க்க வந்துள்ளார். 

ஆனால், பகீரப்பா வேட்டி அணிந்து வந்திருந்ததால், அவரை உள்ளே செல்ல அனுமதிக்காமல் பாதுகாவலர்கள் தடுத்து நிறுத்தி அனுமதி மறுத்துள்ளனர். இது தொடர்பான வீடியோ சமூக வலைத்தளங்களில் வெளியாகி வைரலானது. மேலும், வேட்டி அணிந்து வந்ததால் விவசாயிக்கு அனுமதி அளிக்காத வணிக வளாகத்திற்கு எதிராக கண்டனங்கள் எழுந்து வந்தது. இதனைத் தொடர்ந்து, கன்னட அமைப்பினர் மற்றும் விவசாய சங்கத்தினர், நேற்று அந்த தனியார் வணிக வளாகம் முன்பு போராட்டம் நடத்தினர். விவசாயியை வணிக வளாகத்திற்குள் அனுமதிக்காமல் தடுத்து நிறுத்தியதற்காக வணிக நிர்வாகம், விவசாயி பகீரப்பாவிடம் மன்னிப்பு கேட்க வேண்டும் என்று வலியுறுத்தி போராட்டம் நடத்தினர். இந்த விவகாரம் கர்நாடகா மாநிலம் முழுவதும் பேசுபொருளாக மாறியது. அதுமட்டுமல்லாமல், இந்த விவகாரம் சட்டமன்றம் வரையிலும் சென்றது. 

இந்த நிலையில், வேட்டி அணிந்து வந்த விவசாயியை உள்ளே விட அனுமதி மறுத்த வணிக வளாகத்திற்கு எதிராக அம்மாநில அரசு அதிரடி நடவடிக்கை எடுத்துள்ளது. அதன்படி, அந்த வணிக வளாகத்தை ஒரு வாரத்திற்கு மூட வேண்டும் என்று உத்தரவிட்டுள்ளது. இதனையடுத்து, அந்த வளாகத்திற்கு அதிகாரிகள் சீல் வைத்து நடவடிக்கை எடுத்தனர். இந்த சம்பவம் பெங்களூரில் பரபரப்பை ஏற்படுத்தியுள்ளது.