Skip to main content

ரயில் விபத்து-உயிரிழந்தோர் குடும்பத்திற்கு தலா 10 லட்சம் நிவாரணம் அறிவித்த ரயில்வே

Published on 29/10/2023 | Edited on 29/10/2023

 

Railway Department announced relief of Rs 10 lakh each to the families of the train accident victims

 

ஆந்திராவில் சிக்னல் கோளாறு காரணமாக இரண்டு ரயில்கள் மோதி கோர விபத்து ஏற்பட்டுள்ளது பரபரப்பையும் சோகத்தையும் ஏற்படுத்தியுள்ளது.


 

ஆந்திர மாநிலம் குண்டூரில் இருந்து ராயகடா செல்லக்கூடிய பாசஞ்சர் ரயில் கண்டகப்பள்ளி ரயில் நிலையத்தை நோக்கி சென்ற பொழுது சிக்னல் கோளாறு காரணமாக நின்றது. அப்போது பின்னால் வந்த பலாசா விரைவு ரயில் பாசஞ்சர் ரயில் மீது மோதியது.



இந்த விபத்தில் உயிரிழந்தவர்கள் எண்ணிக்கை 19 ஆக அதிகரித்துள்ளது. இந்த விபத்து சம்பவத்திற்கு பிரதமர் மோடி இரங்கல் தெரிவித்துள்ளார். அதேபோல் இந்த விபத்தில் இறந்தவர்களுக்கு இரங்கல் தெரிவித்துள்ள ஆந்திர முதல்வர் ஜெகன்மோகன் ரெட்டி, உயிரிழந்தவர்கள் குடும்பங்களுக்கு தலா 10 லட்சம் ரூபாய் நிவாரணம் அறிவித்துள்ளார். அதேபோல் ஒன்றிய அரசின் சார்பில் உயிரிழந்தவர்களின் குடும்பங்களுக்கு தலா 2 லட்சம் ரூபாயும், காயமடைந்தவர்களுக்கு 50 ஆயிரம் ரூபாயும் நிவாரணமாக அறிவிக்கப்பட்டுள்ளது. அதேபோல் இந்திய ரயில்வே சார்பில் இந்த  விபத்தில் உயிரிழந்தவர்கள் குடும்பத்திற்கு தலா 10 லட்சம் ரூபாயும், பலத்த காயமடைந்தவர்களுக்கு 2 லட்சம் ரூபாயும், லேசான காயமடைந்தவர்களுக்கு 50 ஆயிரம் ரூபாயும் நிவாரணமாக அறிவிக்கப்பட்டுள்ளது.

 

 

சார்ந்த செய்திகள்

Next Story

தேர்தல் பிரச்சாரத்தில் இலவச கருத்தடை சாதனம்; வைரலாகும் வீடியோ காட்சிகள்

Published on 23/02/2024 | Edited on 23/02/2024
Free contraceptives in election campaign in andhra pradesh

நாடாளுமன்ற மக்களவைப் பொதுத் தேர்தல் விரைவில் நடைபெற உள்ளது. இதனை முன்னிட்டு அரசியல் கட்சிகள் சார்பில் தேர்தல் பணிகளை மேற்கொள்வதற்காகப் பல்வேறு குழுக்கள் அமைக்கப்பட்டு தீவிர ஆலோசனைகள் நடத்தப்பட்டு வருகின்றன. மேலும், நாடாளுமன்றத் தேர்தலுக்கான பணிகளை அரசியல் கட்சிகள் தற்போதே தீவிரப்படுத்தி வருகின்றன. மேலும், அரசியல் கட்சிகளிடையே தொகுதிப் பங்கீடு பேச்சுவார்த்தை தீவிரமடைந்து வருகிறது. 

இதே வேளையில், ஆந்திரப் பிரதேச மாநிலத்தில் விரைவில் வரவுள்ள நாடாளுமன்றத் தேர்தலோடு சட்டமன்றத் தேர்தலும் நடைபெறவிருக்கிறது. ஆந்திரப்பிரதேச மாநிலத்தில் முதல்வர் ஜெகன் மோகன் ரெட்டி தலைமையிலான ஒய்.எஸ்.ஆர் காங்கிரஸ் ஆட்சி நடைபெற்று வருகிறது. இங்கு, ஆட்சியை தக்க வைத்துக் கொள்ள முதல்வர் ஜெகன் மோகன் ரெட்டியின் ஒய்.எஸ்.ஆர். காங்கிரஸ் கட்சியும், ஆட்சியை பிடித்தே தீர வேண்டும் என்று சந்திரபாபு நாயுடுவின் தெலுங்கு தேசம் கட்சியும் தங்களது வேட்பாளர்களை அறிவித்து தேர்தல் பிரச்சாரத்தை தீவிரப்படுத்தி வருகின்றன. அதே சமயம், ஒய்.எஸ்.ஆர். காங்கிரஸ் கட்சி மீது ஊழல் குற்றச்சாட்டையும், நிர்வாகத்திறன் குறித்து தெலுங்கு தேசம் கட்சி விமர்சனம் செய்து வருகிறது. அதே போல், தெலுங்கு தேச கட்சியை பற்றியும் விமர்சனங்களையும், குற்றச்சாட்டையும் ஒய்.எஸ்.ஆர் காங்கிரஸ் முன்வைத்து வருகிறது. 

இந்த நிலையில், தேர்தல் பிரச்சாரத்திற்காக இந்த இரு கட்சிகளும் மக்களுக்கு பரிசுகளை வழங்கி வருகின்றன. அந்த பரிசுப் பொருட்களில் கருத்தடை சாதனம் இருப்பதாக இரு கட்சிகளும் குற்றச்சாட்டு வைத்து வருகிறது. அந்த வகையில், தெலுங்கு தேசம் கட்சியினர், கருத்தடை சாதன பாக்கெட்டுகளை வழங்கி பிரச்சாரம் செய்வதாக ஒய்.எஸ்.ஆர் காங்கிரஸ் கட்சி குற்றம்சாட்டியுள்ளது. இது தொடர்பாக, ஒய்.எஸ்.ஆர் காங்கிரஸ் கட்சியின் அதிகாரப்பூர்வமான எக்ஸ் (ட்விட்டர்) பக்கத்தில், தெலுங்கு தேசம் கட்சியின் சின்னம் பொறிக்கப்பட்ட கருத்தடை சாதன பாக்கெட்டுகளை, அக்கட்சியினர் விநியோகம் செய்வதாக வீடியோ ஒன்றை பகிர்ந்து, ‘இறுதியாக அக்கட்சி பிரச்சாரத்திற்காக மக்களுக்கு கருத்தடை சாதனங்களை விநியோகித்து வருகின்றது. அடுத்து வயாகரா மாத்திரைகளை பகிருமா?’ என்று கேள்வி எழுப்பியுள்ளது.

ஒய்.எஸ்.ஆர் காங்கிரஸ் கட்சி வைத்த குற்றச்சாட்டை அடுத்த இரண்டு மணி நேரத்தில் தெலுங்கு தேசம் கட்சியும், அதே போன்ற வீடியோ ஒன்றை பகிர்ந்து விமர்சனம் செய்துள்ளது. அதில், ஒய்.எஸ்.ஆர் காங்கிரஸ் கட்சியின் சின்னம் பொறிக்கப்பட்ட கருத்தடை பாக்கெட்டுகளை அக்கட்சியைச் சேர்ந்தவர்கள் விநியோகிப்பதாக தெலுங்கு தேசம் கட்சி தனது எக்ஸ் (ட்விட்டர்) பக்கத்தில் வீடியோ ஒன்றை பகிர்ந்து, ‘இது போன்ற கேவலமான பிரச்சாரங்களை செய்யாமல் பிணங்களுக்கு செலவு செய்யலாம்’ என்று கூறி குற்றம்சாட்டியுள்ளது. இந்த இரு கட்சியின், சின்னம் மற்றும் கட்சியின் பெயர் பொறிக்கப்பட்ட கருத்தடை பாக்கெட்டுகள் வழங்குவது தொடர்பான வீடியோக்கள் சமூக வலைத்தளங்களில் வெளியாகி சர்ச்சையாகியுள்ளது.

ஆந்திரப்பிரதேசத்தில் மக்கள் தொகை அதிகமாக இருப்பதால், அங்கு திட்டங்கள் வகுக்கவும், நிதிநிலை சரிசெய்யவும் மிகுந்த சிரமங்கள் ஏற்படுவதாக கூறப்படுகிறது. இதனால், அங்கு மக்கள் தொகையை கட்டுப்படுத்துவதற்கு அரசு, பல்வேறு விழிப்புணர்வுகளை ஏற்படுத்தி வருகிறது. அந்த வகையில், தற்போது நடைபெறும் தேர்தல் பிரச்சாரத்தில் மக்கள் தொகையை கட்டுப்படுத்துவதற்காக விழிப்புணர்வு ஏற்படுத்தவே கருத்தடை சாதனம் விநியோகிப்பட்டதாக கூறப்படுகிறது. 

Next Story

தலைமைச் செயலகம் முன் முற்றுகை போராட்டம்; ஒய்.எஸ்.ஷர்மிளாவை குண்டு கட்டாக தூக்கிய போலீசார் 

Published on 22/02/2024 | Edited on 22/02/2024
YS Sharmila was arrested by the police for Blockade in front of Chief Secretariat for

ஆந்திர மாநில முதலமைச்சரும் ஒய்.எஸ்.ஆர் காங்கிரஸ் கட்சியின் தலைவராகவும் பொறுப்பு வகித்து வருபவர் ஜெகன் மோகன் ரெட்டி. இவரது சகோதரி ஒய்.எஸ். ஷர்மிளா. இவர் ஒய்.எஸ்.ஆர் தெலுங்கானா கட்சியைத் தொடங்கி அதன் தலைவராகப் பொறுப்பு வகித்து வருகிறார். சமீபத்தில் நடந்து முடிந்த தெலுங்கானா சட்டமன்றத் தேர்தலில் ஷர்மிளா போட்டியிடாமல், காங்கிரஸ் கட்சிக்கு ஆதரவு அளித்தார். 

இதனைத் தொடர்ந்து இவர், கடந்த 4 ஆம் தேதி டெல்லியில் காங்கிரஸ் தலைவர் மல்லிகார்ஜுன கார்கே, ராகுல் காந்தி முன்னிலையில் ஒய்.எஸ்.ஷர்மிளா காங்கிரஸில் இணைந்தார். மேலும் அவர் நடத்தி வந்த ஒய்.எஸ்.ஆர். தெலுங்கானா கட்சியையும் காங்கிரஸில் இணைத்தார். இதனையடுத்து, ஆந்திர மாநில காங்கிரஸ் கட்சியின் புதிய தலைவராக ஒய்.எஸ். ஷர்மிளா நியமிக்கப்பட்டார். 

இந்த நிலையில், ஆந்திரப் பிரதேச இளைஞர்களுக்கு வேலைவாய்ப்பின்மை, மாணவர்கள் எதிர்கொள்ளும் பிரச்சனைகளை அரசு தீர்க்க கோரி ஆந்திர மாநில காங்கிரஸ் தலைவர் ஒய்.எஸ்.ஷர்மிளா தலைமையில் மாநில அரசின் தலைமைச் செயலக அலுவலகம் முன் முற்றுகை போராட்டம் நடத்தப்படும் என அறிவிப்பு வெளியிடப்பட்டது. காங்கிரஸ் கட்சியின் இந்த போராட்டத்தைத் தடுக்கும் முயற்சியில் ஒய்.எஸ்.ஷர்மிளாவை கைது செய்து வீட்டுக் காவலில் வைக்க ஆந்திரா போலீசார் ஈடுபட்டனர். ஆனால், அவர் நேற்று (21-02-24) இரவு முழுவதும் காங்கிரஸ் கட்சி அலுவலகத்திலேயே தங்கிவிட்டார்.

இதனை தொடர்ந்து, ஆந்திரா தலைமைச் செயலகத்தை முற்றுகையிடும் போராட்டத்தை விஜயவாடாவில் இன்று (22-02-24) அவர் தொடங்கினார். இதனால், ஷர்மிளாவையும், காங்கிரஸ் கட்சியினரையும் போலீசார் தடுக்க முயன்ற போது தடையை மீறி அவர் முற்றுகை போராட்டத்தை நடத்த முயன்றார்.  இதனால், அவரை போலீசார் குண்டுக் கட்டாக தூக்கி கைது செய்தனர். அப்போது, காங்கிரஸ் தொண்டர்கள் ஆந்திரா அரசுக்கு எதிராக கோஷங்கள் எழுப்பினர். இதனால், அங்கு பரபரப்பு ஏற்பட்டது.