Skip to main content

 “ஒருபோதும் பா.ஜ.க.வுடன் இணைய மாட்டேன்” - சரத் பவார் திட்டவட்டம்

Published on 17/08/2023 | Edited on 17/08/2023

 

Never join BJP Sharad Pawar's plan

 

மகாராஸ்டிராவில் கடந்த ஜூலை மாதம் 2 ஆம் தேதி தேசியவாத காங்கிரஸ் கட்சியைச் சேர்ந்த அஜித் பவார் மற்றும் அவரது ஆதரவு எம்.எல்.ஏ.க்கள் 8 பேர், பா.ஜ.க மற்றும் ஏக்நாத் ஷிண்டே தலைமையிலான சிவசேனா அணியில் இணைந்தனர். அதனை தொடர்ந்து, மகாராஸ்டிரா துணை முதலமைச்சராக அஜித் பவார் பதவி ஏற்றுக் கொண்டார். அவரது அணியைச் சேர்ந்த 8 பேர் முதலமைச்சர் ஏக்நாத் ஷிண்டே தலைமையிலான அமைச்சரவையில் அமைச்சர்களாக பதவி ஏற்றுக்கொண்டனர். துணை முதலமைச்சர் அஜித் பவாருக்கு நிதி மற்றும் திட்டமிடல் துறை வழங்கப்பட்டது. அதே போல், அவரது அணியைச் சேர்ந்த 8 அமைச்சர்களுக்கும் இலாகாக்கள் ஒதுக்கப்பட்டன 

 

இதையடுத்து, ஜூலை மாதம் 17 ஆம் தேதி தெற்கு மும்பையில் உள்ள ஓய்.பி.சவான் மண்டபத்தில் அஜித்பவாரும் அவரது ஆதரவு எம்.எல்.ஏ.க்களும் தேசியவாத காங்கிரஸ் தலைவர் சரத் பவாரை சந்தித்தனர். சரத்பவாரை சந்தித்த பின், பிரபுல் பட்டேல் செய்தியாளர்களை சந்தித்து பேட்டி அளித்தார். அதில், கட்சியின் ஒற்றுமையை பாதுகாக்க நடவடிக்கை எடுக்கும்படி சரத்பவாரிடம் வலியுறுத்தியதாகக் கூறினார். அதனை தொடர்ந்து இரண்டு நாட்கள் கழித்து மீண்டும் அஜித் பவார், சரத் பவாரை சந்தித்து ஆலோசனை நடத்தினார்.

 

இந்த நிலையில், அஜித் பவார் மற்றும் சரத் பவார் இடையே சமீபத்தில் ரகசிய சந்திப்பு நடந்ததாக தகவல் வெளியாகி இருந்தது. அமைச்சரவை விரிவாக்கத்திற்கு பின்பு இருவரும் ரகசியமாக சந்தித்து கொண்டதாக கூறப்படுவது மகாராஷ்டிரா அரசியல் வட்டாரத்தில் பெரும் சலசலப்பை ஏற்படுத்தியுள்ளது.

 

இந்நிலையில் மகாராஷ்டிரா பீட் மாவட்டத்தில் நடந்த ஆலோசனைக் கூட்டத்தில் கலந்து கொண்ட சரத் பவார் செய்தியாளர்களைச் சந்தித்து பேசினார். அப்போது அவர், “மகா விகாஷ் அகாடி கூட்டணியில் தேசியவாத காங்கிரஸ் கட்சி இல்லாமல் காங்கிரஸோடு உத்தவ் தாக்கரே சிவசேனா கட்சியும் இணைந்து தேர்தலை சந்திக்கப் போவதாக வந்த செய்திகள் அனைத்தும் தவறான செய்தியாகும். அஜித் பவார் என்னை சந்தித்து பேசினார். அது என்னுடைய தனிப்பட்ட குடும்ப விஷயம். அதை அரசியலாக்காதீர்கள். அஜித் பவாரை நான் சந்தித்ததை வைத்து கொண்டு பா.ஜ.க.வோடு கூட்டணி சேர இருப்பதாகக் கூறுவது அனைத்தும் வதந்தி.  நான் ஒரு போதும் பா.ஜ.க. கட்சியில் இணைய மாட்டேன். 2024 ஆம் ஆண்டு ஆட்சி மாற்றத்தை ஏற்படுத்த வேண்டியுள்ளது. அதற்கான அனைத்து விதமான முயற்சிகளையும் எடுத்து வருகிறோம். கட்சி சின்னத்துக்கு உரிமை கோரிய விவகாரத்தில் தேர்தல் ஆணையம் அளித்துள்ள நோட்டீஸுக்கு பதில் அளித்துள்ளோம். 

 

மணிப்பூரில் கடந்த நான்கு மாதங்களாக நிலைமை மோசமடைந்துள்ளது. ஆனால், அதைப் பற்றி நாடாளுமன்றக் கூட்டத்தொடரின் முதல் நாளில் நாடாளுமன்றத்திற்கு வெளியே வெரும் 3 நிமிடம் தான் பிரதமர் பேசினார். நம்பிக்கையில்லாத் தீர்மானத்தின் மீதான விவாதத்தில் நீண்ட நேரமாக பதில் அளித்த பிரதமர் மோடி, மணிப்பூர் குறித்து சுருக்கமாகத்தான் குறிப்பிட்டிருந்தார். சுதந்திர தின உரையில் 5 நிமிடம் மட்டுமே பேசுகிறார். அவருக்கு வடகிழக்கு மாநிலங்கள் குறித்து கவலை இல்லை” என்று கூறினார்.

 

 

சார்ந்த செய்திகள்

Next Story

'சில கெட்ட சக்திகள் வெளியேறியுள்ளது'-ஈ.வி.கே.எஸ்.இளங்கோவன் பேட்டி

Published on 03/03/2024 | Edited on 03/03/2024
nn

காங்கிரஸில் சிட்டிங் எம்எல்ஏவாக இருந்த விஜயதரணி அண்மையில் பாஜகவில் சேர்ந்திருந்தது அரசியல் வட்டாரத்தில் பரபரப்பு ஏற்படுத்தி இருந்தது. அதேநேரம் தமிழ்நாடு காங்கிரஸ் திமுகவுடன் கூட்டணி தொகுதி பங்கீடு பேச்சுவார்த்தையை நடத்தி வருகிறது. இந்த நிலையில் ஈரோட்டில் செய்தியாளர்களைச் சந்தித்த காங்கிரஸ் எம்.எல்.ஏ, ஈ.வி.கே.எஸ்.இளங்கோவன் பேசுகையில், ''மீண்டும் வாரணாசி தொகுதியில் பிரதமர் மோடி போட்டியிட இருக்கிறார். யார் கண்டிப்பாக தோற்பார்கள் என்ற பட்டியலை இன்றைக்கு அறிவித்திருக்கிறார்கள். நம்முடைய ஊரின் சாம்பார் பிடித்திருக்கிறது போல அதனால் தான் மோடி அடிக்கடி தமிழகம் வந்து கொண்டிருக்கிறார்.

திமுக கூட்டணியில் சுமூகமாக பேச்சு வார்த்தைகள் நடைபெற்று வருகிறது. இன்னும் ஒரு சில நாட்களில் தொகுதிப் பங்கீடு குறித்து வெளியிடப்படும். இழுபறி எல்லாம் இல்லை. கண்டிப்பாக இந்த தேர்தலோடு காணாமல் போகப் போகிறவர் யார் என்றால் மோடி தான். வரும் நாடாளுமன்ற தேர்தலுக்கு பிறகு மோடி எங்கு தேடினாலும் இருக்க மாட்டார். தமிழகமே அவர்களுடைய சொந்த பூமி என்று நினைத்துக் கொண்டிருக்கிறார்கள். தமிழகத்திலிருந்து வருகின்ற பணத்தையோ, நிதியையோ, வரியையோ மீண்டும் தமிழக வளர்ச்சிக்கு கொடுக்கலாமென்று இல்லாமல் அவர்கள் சுருட்டிக் கொண்டிருக்கிறார்கள்.

ஏழரை லட்சம் கோடி ரூபாயை மோடி சுருட்டி இருக்கிறார். உலக வரலாற்றில் இவ்வளவு பெரிய அயோக்கியத்தனம், லஞ்சம் ஊழல் எங்கேயும் நடந்தது இல்லை'' என்றார்.

விஜயதரணி பாஜகவிற்கு சென்றது குறித்து கேள்விக்கு, ''சில கெட்ட சக்திகள், மோசமான சக்திகள் காங்கிரசை தூய்மைப்படுத்த வேண்டும் என்பதற்காக வெளியேறி இருக்கிறது. அவர்களுக்கு என்னுடைய நன்றிகள்''எ ன்றார்.

'தமிழகத்தில் போதைப் பொருட்கள் பயன்பாடு அதிகமாக இருப்பதாக எதிர்க்கட்சிகள் குற்றம் சாட்டுகின்றன' என்ற கேள்விக்கு, ''தமிழகத்தில் கஞ்சா குடிக்கும் பழக்கம் என்பது நூற்றுக்கணக்கான வருடங்களாக இருக்கிறது. இப்போது அதை கட்டுப்படுத்துவதற்காக முயற்சிகள் எடுக்கும் பொழுது பல இடங்களில் தப்புத் தண்டாவில் ஈடுபடுகிறவர்கள் பிடிக்கப்படுகிறார்கள். அதிமுகவில் எத்தனை சமூகவிரோதிகள் இருக்கிறார்கள் என பட்டியல் எடுத்தால் தமிழகத்தில் பாஜகவிற்கு அடுத்து அதிகமாக குற்றவாளிகள் இருப்பது எடப்பாடியோடு தான் என்பது தெரிய வரும்'' என்றார்.

Next Story

பிரதமர் மோடிக்கு கார்கே சரமாரி கேள்வி!

Published on 02/03/2024 | Edited on 02/03/2024
For Prime Minister Modi, Karke barrage of questions

காங்கிரஸ் தலைவர் மல்லிகார்ஜுன கார்கே, பிரதமர் மோடியை கடுமையாக விமர்சனம் செய்துள்ளார். இது குறித்து அவர் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “பிரதமர் மோடி அறிவித்த ‘மேக் இன் இந்தியா’ என்ற திட்டம் படுதோல்வி அடைந்துவிட்டது. தொழில் உற்பத்தித் துறையில் அரசு அறிவித்த திட்டங்கள் அனைத்தும் முற்றிலும் செயலற்றுவிட்டது. 

கடந்த 10 ஆண்டுகளில் இந்தியாவின் மொத்த உள்நாட்டு உற்பத்தியில், உற்பத்தியால் சேர்க்கப்பட்ட மதிப்பு 16%லிருந்து 13% ஆக ஏன் குறைந்துள்ளது? மோடி அரசின் கீழ் உற்பத்தித் துறையின் சராசரி வளர்ச்சி ஏன் சரிந்தது? காங்கிரஸ் ஆட்சிக் காலத்தில் 7.85% ஆக இருந்தது. இப்போது, அது கிட்டத்தட்ட 6% ஆகக் குறைந்தது. மோடி அரசு 2022க்குள் உற்பத்தித் துறையில் 10 கோடி வேலைகளை வழங்குவதாக உறுதியளித்தது. அந்த வேலைகள் எங்கே? கடந்த 10 ஆண்டுகளில் உற்பத்தித் துறையில் தொழிலாளர் எண்ணிக்கை ஏன் குறைந்துள்ளது? உற்பத்தி இணைக்கப்பட்ட ஊக்கத்தொகை திட்டத்தில் பெரும்பாலானவை செயல்படத் தவறியது ஏன்?

முக்கிய துறைகளுக்கான நிதியில் பாரிய அளவில் பயன்படுத்தப்படாதது ஏன்? ஜவுளித் துறையில் பிஎல்ஐக்கான 96% நிதி பயன்படுத்தப்படவில்லை. ஏ.சி.கள் மற்றும் எல்.இ.டி.யின் பாகங்கள் மற்றும் துணை பாகங்கள் தயாரிப்பதற்காக வெள்ளைப் பொருட்களில் பிஎல்ஐக்கான 95% நிதி பயன்படுத்தப்படாமல் உள்ளது. காங்கிரஸ் ஆட்சிக் காலத்தில் 549% ஆக இருந்த இந்தியாவின் ஏற்றுமதி விகிதம் மோடி ஆட்சியின் போது 90% ஆக சரிந்தது எப்படி? இந்தியாவிற்கு தேவையானது வலுவான மற்றும் உள்ளடக்கிய வேலை வாய்ப்பு உருவாக்கம் ஆகும். உயர் தொழில்நுட்ப நெட்வொர்க்குகளை இணைப்பதன் மூலம் வேலைகளை உருவாக்குபவர்களின் திறன்களை ஊக்குவிப்பது மற்றும் உற்பத்தியை ஒழுங்குபடுத்துவது அவசியம். உற்பத்தி மற்றும் ஏற்றுமதியை ஊக்குவிப்பதில் மதிப்பு கூட்டுதலில் கவனம் செலுத்த வேண்டும்” என்று பதிவிட்டுள்ளார்.