Skip to main content

"காவிரி மேலாண்மை ஆணைய கூட்டத்தில் மேகதாது அணை குறித்து விவாதிக்கக் கூடாது" - புதுச்சேரி சட்டசபையில் தீர்மானம்!

Published on 31/08/2021 | Edited on 31/08/2021

 

"Megha Dadu Dam should not be discussed at Cauvery Management Commission meeting" - Puducherry Assembly resolution!

 

புதுச்சேரி யூனியன் பிரதேசத்தின் 15-வது சட்டப்பேரவையின் நிதிநிலை அறிக்கை கூட்டத்தொடர் கடந்த 26-ஆம் தேதி முதல் நடைபெற்று வருகிறது. நேற்றைய கூட்டத்தில் 13-ஆவது காவிரி நீர் மேலாண்மை ஆணைய கூட்டத்தில் மேகதாது அணைக் கட்டுமான விவாதத்தை எடுத்துக் கொள்ளக்கூடாது என முதலமைச்சர் ரங்கசாமி தீர்மானம் கொண்டுவந்தார். அப்போது அவர் பேசுகையில், "காவிரி ஆற்றின் குறுக்கே மேகதாதுவில் புதிய அணை கட்ட கர்நாடக அரசு திட்டமிட்டுள்ளது. மேகதாதுவில் அணை கட்டப்பட்டால் கர்நாடகாவில் சுமார் 67 டி.எம்.சி காவிரி தண்ணீரைச் சேமிக்க முடியும். இதனால் புதுச்சேரி மாநிலம் காரைக்கால் டெல்டா பகுதிக்கு வழங்கப்பட வேண்டிய 7 டி.எம்.சி காவிரி நீர் முழுமையாகக் கிடைக்காமல் போகும் அபாயம் உள்ளது. இதனால் காவிரியின் கடைமடை நீர்ப் பாசனப் பகுதிகளான தமிழகம் மற்றும் புதுச்சேரிக்கு வரவேண்டிய நீரில் பற்றாக்குறை ஏற்பட்டு காரைக்கால் டெல்டா பகுதியில் விவசாயம் பாதிப்புக்குள்ளாகி நெல் உற்பத்தி மற்றும் பொருளாதாரம் முற்றிலும் பாதிக்கும்.

 

மேகதாது அணை கட்டுவதைத் தடுத்து நிறுத்துமாறு தமிழக அரசு உச்சநீதிமன்றத்தில் வழக்கு தொடர்ந்துள்ளது. கடந்த 2018-ஆம் ஆண்டு டிசம்பர் 3-ஆம் தேதி நடைபெற்ற 2-ஆவது காவிரி நீர் மேலாண்மை ஆணைய கூட்டத்தில் புதுச்சேரி அரசு தனது எதிர்ப்பை தெரிவித்துள்ளது. இதுதொடர்பாக புதுச்சேரியில் கடந்த ஜூலை 14-ஆம் தேதி ஆலோசனைக் கூட்டம் நடத்தப்பட்டு, அதில் எடுக்கப்பட்ட முடிவின்படி, அணை கட்டுவதைத் தடுத்து நிறுத்துமாறு மத்திய அரசுக்குக் கடிதம் எழுத முடிவு செய்யப்பட்டு, அன்றைய தினமே பிரதமர், மத்திய உள்துறை அமைச்சர் மற்றும் மத்திய நீர்வளத்துறை அமைச்சர் ஆகியோருக்கு கடிதம் அனுப்பப்பட்டுள்ளது.

 

தமிழக அரசு மூலம் உச்ச நீதிமன்றத்தில் இது சம்பந்தமாக வழக்கு தொடரப்பட்டு நிலுவையில் உள்ள போது அது நீதிமன்ற வரம்பிற்கு உட்பட்டதாகும். எனவே இன்று (31-ஆம் தேதி) நடைபெற உள்ள 13-ஆவது காவிரி நீர் மேலாண்மை ஆணைய கூட்டத்தின் நிகழ்ச்சி நிரலில் மேகதாது அணைக் கட்டுமான விவாதம் எடுத்துக் கொள்ளக்கூடாது என ஒருமனதாகச் சட்டசபையில் தீர்மானம் நிறைவேற்ற வேண்டுகிறேன்" என்றார். 

 

முதலமைச்சர் ரங்கசாமி கொண்டு வந்த இந்த தீர்மானத்தின் மீது பேசிய தி.மு.க எம்.எல்.ஏ நாஜிம், "மேகதாது அணை விவகாரம் தொடர்பாக உச்சநீதிமன்றத்தில் தமிழக அரசு வழக்கு தொடர்ந்துள்ளது. அந்த வழக்கில் புதுச்சேரி அரசும் ஒரு மனுதாரராகச் சேர வேண்டும்" என்றார். அதற்கு  அமைச்சர் லட்சுமி நாராயணன் பதிலளித்துப் பேசுகையில், "தமிழக அரசு தொடர்ந்துள்ள வழக்கில் நாமும் ஒரு மனுதாரராகத் தாமாகவே சேர்க்கப்பட்டுள்ளதால் வழக்கு தொடர வேண்டியதில்லை" எனப் பதிலளித்தார். 

 

சுயேச்சை எம்.எல்.ஏ பி.ஆர்.சிவா பேசும்போது, "சட்டசபையில் தீர்மானம் நிறைவேற்றுவதையும் தாண்டி இங்குள்ள பா.ஜ.க எம்.எல்.ஏக்களும் டெல்லி சென்று, இந்த விவகாரத்திற்கு முக்கியத்துவம் கொடுத்து, தமிழ்நாடு புதுச்சேரி மக்களுக்கு எந்தவித பாதிப்பும் ஏற்படாத வகையில் தெளிவான முடிவு எடுக்க மத்திய அரசிடம் வலியுறுத்த வேண்டும்" என்றார். அதற்கு அமைச்சர் நமச்சிவாயம், “மேகதாது அணை கட்ட கூடாது என்பதில் புதுச்சேரி பா.ஜ.க தெளிவாகவும், உறுதியாகவும் இருக்கிறது. முதல்வர் கொண்டு வந்த தீர்மானத்தை முழுமையாக ஆதரிக்கிறது" என்றார். இறுதியாக சபாநாயகர் செல்வம் இந்த தீர்மானத்தின் மீது குரல் வாக்கெடுப்புக்கு விடுத்து ஏகமனதாக நிறைவேற்றப்பட்டது. 

 

 

சார்ந்த செய்திகள்

Next Story

ரஜினி பாட்டு பாடிய ஜப்பானிய ரசிகர் - வீடியோ வைரல்

Published on 02/03/2024 | Edited on 02/03/2024
japanese sing rajinikanth muthu movie song

புதுச்சேரி பல்கலைக்கழகத்தில் எம்.பி.ஏ மாணவர்களுக்கான பன்னாட்டு வணிகத்துறை சார்பில் தொழிற்சாலை - கல்வி நிறுவனங்கள் சந்திப்பு நிகழ்ச்சி நடைபெறுகிறது. மொத்தம் மூன்று நாள் நடக்கும் இந்த நிகழ்ச்சியின் தொடக்க விழாவில் ஜப்பான் நாட்டு ரெட்ரோ நிறுவனத்தின் முன்னாள் பொது மேலாளர் கோபுகி சேன் கலந்து கொண்டார். 

அப்போது நடந்த கருத்தரங்கில் தமிழ் மொழி குறித்து பேசிய அவர், தமிழ் தனக்கு நன்றாகவே தெரியும் என்றும், தமிழ் சினிமா பாடலும் பாடுவேன் என்றும் தெரிவித்திருந்தார். இறுதியாக ரஜினியின் முத்து படத்தில் இடம்பெற்ற ‘ஒருவன் ஒருவன் முதலாளி...’ பாடலை முழுவதுமாக பாடி அசத்தினார். அதை அங்கிருந்த மாணவர்கள் உள்பட அனைவருகளும் கைதட்டி ரசித்தனர். இது தொடர்பான வீடியோ சமூக வலைத்தளங்களில் தற்போது வைரலாகி வருகிறது. 

கே.எஸ். ரவிக்குமார் இயக்கத்தில் ரஜினி, மீனா, சரத்பாபு உள்ளிட்ட பலர் நடிப்பில் 1995 ஆம் ஆண்டு வெளியான படம் 'முத்து'. கவிதாலயா ப்ரோடக்‌ஷன்ஸ் தயாரித்திருந்த இப்படத்திற்கு ஏ.ஆர். ரஹ்மான் இசையமைத்திருந்தார். ரஜினியின் ஸ்டைல், காமெடி, ஆக்‌ஷன் என கமர்ஷியல் படங்களுக்கு ஏற்ற அனைத்து அம்சங்களும் இந்தப் படத்தில் இருந்ததால் ரசிகர்கள் அமோக வரவேற்பு கொடுத்தனர். கிட்டத்தட்ட 170 நாட்களுக்கு மேல் திரையரங்கில் வெற்றிகரமாக ஓடியது. மேலும் ஜப்பானில் மட்டும் 180க்கும் மேற்பட்ட நாட்கள் வெற்றிகரமாக ஓடியது. அங்கு வசூலிலும் சாதனை படைத்தது குறிப்பிடத்தக்கது.

Next Story

மத்திய சிறைச்சாலையில் பார்த்திபன் செய்த ஏற்பாடு

Published on 08/01/2024 | Edited on 08/01/2024
parthiban new year celebration in pondicherry central jail

இயக்குநரும் நடிகருமான பார்த்திபன் இரவின் நிழல் படத்தை தொடர்ந்து, '52 ஆம் பக்கத்தில் ஒரு மயிலிறகு' என்ற தலைப்பில் ஒரு படத்தை உருவாக்கி வருகிறார். மேலும் இரண்டு படங்களை உருவாக்கவுள்ளதாகவும் தெரிவித்திருந்தார். இப்போது அதன் பணிகளில் பிசியாக இருக்கிறார். 

இந்த நிலையில் பாண்டிச்சேரி மத்திய சிறைச்சாலையில் புத்தாண்டை முன்னிட்டு அவர் நடத்தி வரும் பார்த்திபன் மனித நேய மன்றம் மூலமாக, பாடகர் ஸ்ரீ ராமை அழைத்து கொண்டு ஒரு இசைக்கச்சேரி நடத்தியுள்ளார். சிறைச்சாலையில் இருப்பவர்கள், புத்தாண்டை மிகசிறப்பாக, இதுவரை அவர்கள் பார்க்காத ஒரு இன்னிசையுடன் ஆரம்பிக்க நினைத்து இதனை ஏற்பாடு செய்துள்ளதாக அவரது எக்ஸ் பக்கத்தில் தெரிவித்துள்ளார். இது தொடர்பான வீடியோ ஒன்றையும் இணைத்துள்ளார்.  

கடந்த ஆண்டு சென்னையில் நடந்த புத்தகக் கண்காட்சியில், சிறைத்துறை மற்றும் சீர்திருத்த துறை சார்பாக ஒரு அரங்கு வைக்கப்பட்டது. இதில் சிறைக் கைதிகளுக்கு பயன்படும் வகையில் தானமாக புத்தகம் பொதுமக்கள் கொடுத்தால் அதை கைதிகளுக்கு கொண்டு சேர்க்கும் வகையில் அமைக்கப்பட்டிருந்தது. பார்த்திபன் ஒவ்வொரு அரங்காக சென்று சிறைவாசிகளுக்காக புத்தகம் வேண்டி மடிப்பிச்சை கேட்டு, சேகரித்த புத்தகங்களை அந்த அரங்கில் சேர்த்தார் என்பது குறிப்பிடத்தக்கது.