Skip to main content

“தேநீர், சமோசாக்களுக்காக மட்டுமே இந்தியா கூட்டணியின் சந்திப்புகள் இருக்கும்...” - ஜனதா தள எம்.பி. பரபரப்பு பேச்சு

Published on 07/12/2023 | Edited on 07/12/2023

 

 Janata Dal MP says India Alliance meetings are only for tea and samosas" -

 

அடுத்தாண்டு நடைபெறவிருக்கிற நாடாளுமன்றத் தேர்தலில் பா.ஜ.க. ஆட்சியை வீழ்த்துவதற்கு எதிர்க்கட்சிகள் சார்பில் பீகார் முதல்வர் நிதிஷ்குமாரின் ஜனதா தளம், திமுக, காங்கிரஸ், சமாஜ்வாதி, திரிணாமுல் காங்கிரஸ் உட்பட 25க்கும் மேற்பட்ட கட்சிகள் ஒன்றிணைந்து இந்தியா என்ற கூட்டணியை உருவாக்கி தங்களது ஆதரவைப் பெருக்கி வருகின்றனர். அதில்,  பீகார் மாநிலம் பாட்னாவில் இந்தியா கூட்டணியின் முதல் கூட்டம் கடந்த ஜூன் மாதம் 23 ஆம் தேதி பீகார் முதல்வர் நிதிஷ்குமார் தலைமையில் நடைபெற்றது. இதையடுத்து, பெங்களூர், மும்பை என அடுத்தடுத்த ஆலோசனைக் கூட்டம் நடைபெற்றது.

 

இதற்கிடையே, தெலங்கானா, மத்தியப் பிரதேசம், ராஜஸ்தான், சத்தீஸ்கர், மிசோரம் ஆகிய ஐந்து மாநிலங்களில் நடைபெறும் சட்டமன்றத் தேர்தலையொட்டி இந்தியா கூட்டணியின் ஆலோசனைக் கூட்டம் தள்ளிப்போடப்பட்டது. மேலும், இந்த சட்டமன்றத் தேர்தலில் மத்தியப் பிரதேசம், ராஜஸ்தான், சத்தீஸ்கர் ஆகிய மாநிலங்களில் பா.ஜ.க பெருமளவு வெற்றி பெற்று ஆட்சியைப் பிடித்துள்ளது. தெலங்கானாவில் மட்டும் காங்கிரஸ் முதன் முறையாக வெற்றி பெற்று ஆட்சியைப் பிடித்துள்ளது. அதேபோல், மிசோரம் மாநிலத்தில் ஸோரம் மக்கள் இயக்கம் அபார வெற்றி பெற்று ஆட்சியைப் பிடித்துள்ளது. 

 

இதனையடுத்து, 4 மாதங்களாக நடைபெறாமல் இருந்த இந்தியா கூட்டணியின் ஆலோசனைக் கூட்டம் நேற்று (06-12-23) டெல்லியில் காங்கிரஸ் தலைவர் மல்லிகார்ஜுன கார்கே தலைமையில் அவரது வீட்டில் நடைபெறும் என்று அறிவிக்கப்பட்டிருந்தது. இந்த ஆலோசனைக் கூட்டத்தில், மேற்கு வங்க முதல்வரான மம்தா பானர்ஜி, உத்தரப் பிரதேச முன்னாள் முதல்வரான அகிலேஷ் யாதவ் ஆகியோர் பங்கேற்கப் போவதில்லை என்று அறிவிக்கப்பட்டது. இதற்கிடையே, பீகார் முதல்வர் நிதிஷ்குமார் உடல்நலம் பாதிக்கப்பட்டு இருப்பதால் தன்னால் இந்தக் கூட்டத்தில் கலந்துகொள்ள முடியாது என்று தெரிவித்துவிட்டார். 

 

அதில் 17 கட்சி பிரதிநிதிகள் மட்டும் கலந்து கொண்ட ஆலோசனைக் கூட்டத்தில் டிசம்பர் 3வது வாரத்தில் மீண்டும் ஆலோசனை நடத்துவது என்று முடிவு செய்யப்பட்டுள்ளது. அதில் அனைத்து எதிர்க்கட்சித் தலைவர்களும் கலந்து கொள்வார்கள் என்று தெரிவிக்கப்பட்டுள்ளது. இந்த நிலையில், நிதிஷ்குமாரின் ஜனதா தளம் கட்சியின் எம்.பி.யான சுனில் குமார் பிண்டு, இந்தியா கூட்டணி சார்பாக கூடிய கூட்டங்கள் எல்லாம் ‘தேநீர், சமோசாக்களுக்கு’ மட்டுமே நடக்கும் என்று விமர்சனம் செய்துள்ளார்.

 

இது குறித்து செய்தியாளர்களைச் சந்தித்துப் பேசிய எம்.பி. சுனில் குமார் பிண்டு, “மோடி மீது பொதுமக்கள் நம்பிக்கை வைத்துள்ளனர். அதனைத்தான் இந்த ஐந்து மாநில தேர்தல் முடிவுகள் காட்டுகின்றன. மூன்று மாநிலங்களில் பெரும்பான்மை மற்றும் மோடியின் உத்தரவாதத்தில் பொதுமக்கள் முழு நம்பிக்கை வைத்திருப்பதை இந்த வெற்றி நிரூபித்துள்ளது. நாம் மக்களின் விருப்பங்களை புரிந்துகொண்டு பரீசிலிக்க வேண்டும். மேலும், பீகார் முதல்வர் நிதிஷ்குமார், என்னை எப்போது வேண்டுமானாலும் பதவி நீக்கம் செய்யலாம். 

 

மாநிலங்களில் யாருடைய பலத்தில் நிற்கிறதோ அந்த மக்களை புறக்கணிப்பதுதான் காங்கிரஸின் வேலை. பீகாரின் ஜே.டி.யூ, உத்தரப் பிரதேசத்தில் எஸ்.பி. கட்சி, ஜார்க்கண்டில் ஹேமந்த் சோரன் ஆகிய அனைவரும் காங்கிரஸால் புறக்கணிக்கப்பட்டனர். அதன் விளைவாகத்தான் 3 மாநிலங்களிலும் காங்கிரஸ் தோல்வி அடைந்துள்ளது. காங்கிரஸ் பிராந்திய கட்சிகளை முன்னிலைப்படுத்த வேண்டும். அப்போதுதான் இந்தியாவுக்கு எதிர்காலம் இருக்கும். நாடாளுமன்றத் தேர்தல் நடைபெறுவதற்கு முன்னதாக தொகுதி பங்கீடு குறித்த விவாதம் நடைபெறும் வரை எதிர்க்கட்சிகளின் இந்தியா கூட்டணியின் கூட்டங்கள் அனைத்தும் தேநீர் மற்றும் சமோசாக்களுக்கு மட்டுமே நடக்கும்” என்று கூறியுள்ளார். கட்சியில் இருந்து கொண்டு மோடியை பாராட்டி பேசிய சுனில் குமார் பிண்டுவை ராஜினாமா செய்ய வேண்டும் என்று ஜனதா தள கட்சியினர் வலியுறுத்தி வருகின்றனர்.

 

 

சார்ந்த செய்திகள்

 

Next Story

'நீங்கள் வெற்றி பெற்றுள்ளீர்கள்; ஆனால் ஆட்சி எங்களிடம் இருக்கிறது' - வானதி ஸ்ரீனிவாசன் பேட்டி

Published on 16/06/2024 | Edited on 16/06/2024
' You have succeeded; But the government is with us' - Vanathi Srinivasan interview

நேற்று கோவையில் திமுக கூட்டணிக் கட்சிகள் சார்பில் முப்பெரும் விழா நடைபெற்றது. இதில் திமுகவில் கூட்டணியில் அங்கம் வகிக்கும் கட்சித் தலைவர்கள் கலந்து கொண்டனர். தமிழகத்தில் 40 தொகுதிகளிலும் திமுக கூட்டணி வெற்றி பெற்றதை பறைசாற்ற இந்த முப்பெரும் விழா நடைபெற்றது. இந்நிலையில் கோவையில் செய்தியாளர்களைச் சந்தித்த பாஜக எம்எல்ஏ வானதி சீனிவாசனிடம் செய்தியாளர்கள் இது குறித்து கேள்வி எழுப்பினர். அதற்குப் பதிலளித்த அவர், ''இதற்கு முன்பு கூடதான் இதுபோன்ற கூட்டணியில் அவர்கள் வெற்றி பெற்றுள்ளார்கள். இது முதல் தடவை அல்ல. நீங்கள் வெற்றி பெற்றுள்ளீர்கள் ஆனால் ஆட்சி எங்களிடம் இருக்கிறது அவ்வளவுதான் வித்தியாசம். நீங்கள் தமிழ்நாட்டில் வெற்றி பெற்றிருக்கலாம் ஆனால் மத்தியில் மூன்றாவது முறையாக எங்களிடம் ஆட்சிப் பொறுப்பை மக்கள் கொடுத்திருக்கிறார்கள். உங்களோடு கூட்டணியில் உள்ளவர்கள் அடுத்த சட்டசபை தேர்தல் வரை எத்தனை நாள் கூட்டணியில் இருப்பார்கள் என்பதை நாங்கள் பொறுத்திருந்து பார்க்கிறோம்.

எங்களுடைய கூட்டணி பலமான கூட்டணியாக உள்ளது. 2004-இல் திமுக மத்தியில் கூட்டணி அரசின் ஆட்சி அமைக்கின்ற போது மந்திரிகளுடைய துறைகளுக்காக என்னென்னவெல்லாம் பஞ்சாயத்து நடந்தது; யார் யார் கிட்ட எல்லாம் பஞ்சாயத்து நடந்தது. பத்திரிகையாளர்கள்தான் எந்த மினிஸ்ட்ரி யாருக்கு வேண்டும் என முடிவு செய்துகொண்டு இருந்தார்கள். ஆனால் இப்பொழுது எவ்வளவு ஸ்மூத்தாக கூட்டணி அரசு எல்லா கூட்டணிக் கட்சிகளுடன் இணைந்து நடந்துள்ளது.

கடந்த ஏழாம் தேதி பார்லிமென்டில் நிதீஷ்குமாரும், சந்திரபாபு நாயுடுவும் இவ்வளவு திறமையான பிரதமருடைய தலைமையில் பணியாற்றுவதற்காக நாங்கள் காத்துக் கொண்டிருக்கிறோம் என இரண்டு தலைவர்களும் பேசுகிறார்கள். அதனால் எங்களுடைய கூட்டணியில் எந்தக் குழப்பத்தையும் ஏற்படுத்த முடியும் என்று நினைக்க முடியாது. அத்தனை கூட்டணிக் கட்சிகளும் பிரதமர் மோடி மீது பிரம்மாண்டமான நம்பிக்கை வைத்துள்ளார்கள்; எதிர்பார்ப்பை வைத்துள்ளார்கள். எங்களுடைய ஐந்து வருட காலம் எந்தவித சிக்கலும் இல்லாமல் நல்லபடியாக போகும். நாங்கள் எந்தப் பத்திரிகையாளரையும், இடைத் தரகரையும், புரோக்கரையும் வைத்துக்கொண்டு மந்திரி சபையை அமைக்கவில்லை'' என்றார்.

Next Story

'நீட் தேர்வின் தீமையை முன்னறிவிப்பு செய்தது திமுகதான்'- முதல்வர் மு.க.ஸ்டாலின்  

Published on 09/06/2024 | Edited on 09/06/2024
'It was DMK who predicted the evil of NEET'- Chief Minister M.K.Stalin

நீட் தேர்வின் தீமைகளை அனைவருக்கும் புரிய வைக்க ஏ.கே.ராஜன் தலைமையில் குழு அமைத்தது திமுகதான் என தமிழக முதல்வர் மு.க.ஸ்டாலின் தெரிவித்துள்ளார்,

அண்மையில் நடைபெற்ற நீட் தேர்வில் முறைகேடுகள் நடைபெற்றிருப்பதாக எதிர்க்கட்சிகள் கடுமையாக விமர்சனம் வைத்து வருகின்றனர். ஒரே தேர்வு மையத்தில் தேர்வு எழுதிய 7-க்கும் மேற்பட்டோர் முதல் மதிப்பெண்கள் பெற்றுள்ளது சந்தேகத்தை எழுப்பிய நிலையில், எதிர்க்கட்சிகள் குற்றச்சாட்டுகளை தொடர்ச்சியாக வைத்து வருகின்றனர். நாடாளுமன்றத்தில் இது தொடர்பாக குரல் எழுப்பப்படும் என காங்கிரஸ் தலைவர் ராகுல் காந்தி தெரிவித்திருக்கிறார்.

இந்நிலையில் தமிழக முதல்வர் மு.க.ஸ்டாலின் வெளியிட்டுள்ள 'எக்ஸ்' வலைத்தள பதிவில், 'நீட் தேர்வின் ஆபத்தை முதலில் முன்னறிவித்தது திமுக தான். ஆட்சிக்கு வந்த பிறகு நீதிபதி ஏ.கே.ராஜன் தலைமையில் உயர்மட்ட குழு அமைத்து நீட் அடிப்படையிலான சேர்க்கையின் தாக்கத்தை நாங்கள் ஆய்வு செய்தோம். முழுமையாக இதற்கான அறிக்கை தாக்கல் செய்யப்பட்டிருக்கிறது. அந்த அறிக்கையின் பரிந்துரை அடிப்படையில் நீட் தேர்வில் இருந்து தமிழகத்திற்கு விலக்கு அளிக்கக்கோரும் மசோதா தமிழக சட்டப்பேரவையில் ஒருமனதாக நிறைவேற்றப்பட்டு குடியரசுத் தலைவருக்கு அனுப்பி வைக்கப்பட்டு இதுவரை ஒப்புதலுக்காக காத்திருக்கிறது. சமீபத்திய பெரிய அளவிலான முரண்பாடுகள் நீட் தேர்வுக்கு நாடு முழுவதும் எதிர்ப்பு அதிகரித்து வருவதை வெளிக் காட்டுவதாக உள்ளது. நீட் தேர்வுக்கு எதிராக நாங்கள் தேசிய அளவில் பரப்புரை மேற்கொள்வோம். நாடாளுமன்றத்தில் இது சம்பந்தமாக இந்தியா கூட்டணிக் கட்சித் தலைவர்கள் குரல் எழுப்ப இருக்கிறார்கள்' என அந்த பதிவில் தெரிவித்துள்ளார்.

நீட் தொடர்பான ஏ.கே.ராஜன் அறிக்கையை தமிழ், ஆங்கிலம், இந்தி, தெலுங்கு, மலையாளம், மராத்தி, கன்னடம், பஞ்சாபி, பெங்காலி உள்ளிட்ட ஒன்பது மொழிகளில் இணைத்து எக்ஸ் பக்கத்தில் இந்த பதிவினை தமிழக முதல்வர் மு.க.ஸ்டாலின் வெளியிட்டு இருக்கிறார்.